الحياة بقا لونها لحمة !!

الحياة بقا لونها لحمة !!

أنا حبيت أعيد عليكم وأقولكم كل سنة وانتوا طيبين ..

وهابي نيو خروف عليكم يا رب ..

العيد السنة دي غير كل الأعياد .. والأفراح بتنادي جيالنا فى الميعاد ..

كل سنة وانتوا طيبين يا جماعة ..

بصراحة العيد السنة دي جامد وزي الفل ..

طبعا كله ظبط نفسه وافترس الخروف المسكين .. والناس بقا خدت على أكل اللحمة ونسيت أفضال الفول والطعمية اللى صبروا معانا سنين ..

يا جماعة الكلام دا مش كويس ومش صحي .. إوعوا تاخدوا على اللحمة .. دي مضرة بالصحة وبتجيب أمراض كتير وأكبرها .. مرض خواء الجيب .. حد سمع عنه ..

أما الفول والطعمية مفيدين جدا للجسم .. وعلى رأي الأستاذ سمير غانم الواحد يضرب الفول الصبح ويمشى طول اليوم ميتهزلوش رمش .. ومش فاهم أي حاجة ..

يا جماعة مين يقدر يعيش من غير الفول والطعمية .. دا الأكلة الرسمية الأولى للشعب المصري بالذات .. دا الواحد خايف بعد العيد ده واللحمة اللى مغرقا الدنيا إن الواحد لا سمح الله يعني ياخد على اللحمة وللا حاجة تبقى مصيبة ..

دا أنا امبارح قابلت واحد صاحبي لقيته فرحان أوي وبيقولي أنا مبسوط أوي أنا مش مصدق نفسى .. أنا دلوقتى بس عايز أغنى الأغنية اللى بتقول الحياة بقا لونها لحمة ..

قابلت واحد تاني لقيته بيقولى الله يخرب بيت اللحمة وسنينها أنا من ساعة ما أكلت اللحمة وأنا حاسس إنى تعبان وصحتى مش أد كدا .. فين أيام الفول والطعمية .. الواحد كان بيضرب الأكلة دي ويخرج زي الأسد ومش حاسس بأي حاجة والناس تدغدغ فيك فى المواصلات وانت ولا هنا ..

أما أنا بقا فكان شكلي كان يموت من الضحك يوم العيد ده .. أنا بقا قعدت آكل فى اللحمة بقا .. ما هو لحمة بالعبيط يا جدعان .. ومن غير أر ولا حسد كلكم أكيد روشتوا نفسكو مش أنا بس يعني .. وبعدين لقيت بطني بقت كبيرة أوي لدرجة إني بدأت أشك فى الموضوع ده .. ومحدش يفهمني غلط فى الحتة دي بالذات .. أنا قصدي بقيت عامل زي بوحة وهو بيقول دي وزة منيلة بنيلة وزة واخدة فوار دخلت نفشت جوا ..

ورحت نايم على السرير .. ورحت قايل زي محمد صبحي فى مسرحية تخاريف لما كان غني وتخين أوي ..

يا سنااااااااااااااام .. الأكن بفتنا .. ( يا سلام .. الأكل بافترا ) أصل كان طالع أخنف .. هههههههه

والبيه دخل الحمام ادعوله ربنا يسهله .. ياااااااااااارب

والواحد صحته فى النازل من يوميها  ..

لحمة إيه وكلام فاضي إيه ده ..

دا الفول والطعمية عشرة عمر وعمرهم ميتعبوك ولا يحسسوك بأي حاجة .. ربنا يخليهم

تسقط اللحمة .. ويحيا الفول والطعمية إلى الأبد .. إلى الأبد .. إلى الأبد ..