ليلة رأس السنة

يا جماعة اللي بيحصل دا مينفعش خالص ..

الناس اتهوست براس السنة ده وكل همهم انت هتعمل إيه فى راس السنة .. كل اللى يشوفك وللا يقابلك وللا يتصل بيك وللا يبعتلك ميل .. مفيش كلام غير على راس السنة !!

وكأن راس السنة دي هتحصل معجزة والسنة الجديدة دي هتبقى حاجة مختلفة جدا وغير كل السنين اللي فاتت زي ما حصل السنة اللى فاتت واللى قبلها ويجيبولك فى التلفزيون برامج مخصوص عشان يسألوهم انتوا ناويين تعملوا إيه فى راس السنة ؟ !!

قرأت فى مدونة ( welcome in my café ) للمعلمة يمنى كلام بنفس المعنى .. البنت مخنوقة أوي ومفقوعة أوي زي حالاتي من اللى بيحصل ده لدرجة إنها بتفكر تربى دقنها .. !!!

شفتوا الحالة وصلت لدرجة إيه .. يمنى هتربي دقنها يا رجالة .. يا لهووووووي

وبعدين أنا مش فاهم ليه كل الاهتمام ده برأس السنة طيب أنا حقول حاجة وأي حد يقوللى لأ انت مفترى وظالم والكلام ده مبيحصلش لو يقدر .. الزيطة دي كلها عشان راس السنة الميلادية طيب كويس ..

حد يقدر يقوللى إن نفس الاهتمام ده هيكون موجود فى رأس السنة الهجرية .. وبالمناسبة هو قرب برضه عشان تبقى المقارنة واضحة .. مفيش مانع إننا التقويم بتاعنا ميلادي يبقى السنة الجديدة يكون لها اهتمام ونركز فيها وكل واحد يحسب نجاحاته السنة اللى فاتت ويرتب إنه يكون أحسن فى السنة الجديدة .. بس مش كدا يا جدعان .. كدا الموضوع بقا أوفر أوي يعني ..

يا جماعة دا عيد الأضحى اللى لسه خلصان من كام يوم مكنش في الاهتمام دا كله من الناس .. ولا حد من اللى صدعوني اليومين دول سألني ناوي تعمل إيه فى عيد الأضحى .. طبعا كانت هتبقى الإجابة واضحة وسهلة وبسيطة .. كنت حقول أنا ناوي آكل لحمة وبس .. !!

طبعا مننساش نقول لإخواننا المسيحيين كل سنة وانتوا طيبين ونعيد عليهم فى عيدهم زي ما هما بيعيدوا علينا فى عيدنا وبيحتفلوا معانا كمان بيه فواجب علينا نعيد عليهم ..

لكن يا جماعة برضه نهتم بمناسبتنا  كلها برضه نفس الاهتمام ومنديش مناسبة أكتر من حقها .. والاستعدادات اللى الناس بتعملها فى راس السنة دي مش عادية .. والكوارث اللى بتحصل فى ليلة راس السنة دي مش ممكن وكلنا طبعا فاهمين مش محتاجة توضيح ..

الناس فى ليلة راس السنة دي بتتصرف وكأنهم معاهم إذن أو صك من ربنا سبحانه وتعالى إنه يعصوه فى الليلة دي .. ودا كلام مش سليم يا جماعة لأن ربنا مطلع علينا فى كل وقت وكل مكان .. والحاجة الحرام بتبقى برضه حرام فى ليلة راس السنة .. مبتترفعش الحرمانية من عليها يعني ..

لأنك ممكن تلاقي حد بيقولك يا عم عادي عيش دي ليلة راس السنة هو احنا يعنى بنعمل كدا كل ليلة دي ليلة كل سنة اللى بنروش فيها ونظبط نفسنا .. طيب يا فالح تضمن منين إنك متموتش فى الليلة دي وتبقى نهيت حياتك بخاتمة زي الزفت ..

يا جماعة نخاف من ربنا ونبعد عن الحاجة الحرام لأنها حرام فى كل وقت ومش معني إن دي ليلة راس السنة يبقى خلاص انت براءة واعمل اللى انت عايزه ..

أنا مش بنكد ولا غاوي هم ولا حاجة أنا فريش وبموت فى الهزار والتهريج ومقضيها .. لكن وقت الجد أنا رجل كالسيف .. !! بجد يا جدعان أرجوكم اللى يقرأ كلامي ده يحاول إن فرحته فى ليلة راس السنة متبقاش بإنه يعصي ربنا .. يا سيدي افرح وهيص وروش وزأطط وكل حاجة لكن بلاش حاجة حرام هي الفرحة متكملش من غير الحرام وللا إيه ؟؟!!

أنا فى آخر كلامي بقولكم كل سنة وانتوا طيبين وسنة سعيدة عليكم يا رب والسنة الجاية تكون أحسن من اللى فاتت وكل واحد فينا يحقق أحلامه وكل أمنياته تبقى حقائق .. واللى مقدر يعمله السنة اللى فاتت ربنا يوفقه ويعمله السنة دي ونبقى أحسن ناس فى الدنيا كلها ..

هابى نيو ييير دا بالانجليزي أما بالعربي بقا ( Happy New Year   )

-------------------------------

وفى آخر الكلام عايز أسأل سؤال مهم محيرني ..

انت ناوي تعمل إيه فى السنة الجديدة .. !! ههههههههههههه