الأشكيف

أنا الأشكيف .. جنُّ مخيف .. نياااااهاهاهاهاهاها ( ضحكة مرعبة ) ..

أكيد أي حد عمره عدى العشرين سنة عارف الجملة دي كويس وفاكرها جدا ..

وأكيد قعد بسببها بتاع 8 .. 9 ..3 سنين كدا مينامش من الخوف ..

واللى أعمارهم أقل من 20 سنة أنا حقولهم إيه الحوار ده ..

دي كانت فى فوازير ألف ليلة وليلة من زمااااااااااان واحنا صغيرين .. وعمك الأشكيف دا كان عبارة عن مسخ شكلك مخيف وكان بيختفى ويظهر وبتاع وكان بيظهر فى صورة بني آدم .. وفي آخر القصة .. خد سيفك يا زعفران .. وقتل الأمير زعفران عمك الأشكيف وتوتة توتة فرغت الحدوتة .. حلوة وللا ......... ؟؟

كانت فعلا حاجة مخيفة بالنسبة للأطفال وعشان كدا منعوا عرضها من التليفزيون المصري الجميل اللى بيحافظ على مشاعر كل المشاهدين أطفال وشباب وكبار وعواجيز وشيوخ وكهول واللى ماتوا كمان .. يا سلام على التليفزيون بتاعنا .. يا راجل دا من كتر مشاعرهم وإحساساتهم الجامدة أوي والرقيقة جدا فى نفس ذات الوقت مبقوش يعرضوا خالص وطول اليوم برامج تجيب للواحد انتفاخ فى ضوافر رجله ..

وطبعا الناس السطحيين والجهلة يتخيلوا إنهم مش عارفين يجيبوا حاجة كويسة الناس تشوفها ودا طبعا مش صح .. دول عايزين يطفشوا الناس ويريحوهم عشان مفيش حد يتهف فى عقله ويحاول يقعد يتفرج على التليفزيون خالص وميضيعوش وقتهم الثمين فى كلام فاضي .. ويبقوا بكدا خلوا الناس تكره التلفزيون خالص ويركزوا فى حاجة أهم ..

شفتوا بقا إننا كنا ظالمين إخواننا الكويسين بتوع التليفزيون المصري .. يا أخي فعلا ( ياما فى الحبس مظاليم ) ..

طيب حد يسألني سؤال محرج ويقوللي يا عم واحنا مالنا واكل دماغنا من بدري بحوار الأشكيف المخيف ده ليه .. ؟ طبعا أنا لازم أرد وإلا هيبقى شكلي إيه فى هيئة حروق اللسان ..

طبعا أرد وأقوله دا سؤال لطيف أنا أحب دايما اللى يسألني .. بص يا سيدي ولا سيدك إلا أنا .. الكلام فى حوار الأشكيف دا جه نتيجة اللى واحد شايفة بيحصل اليومين دول على الفضائيات والسيحان اللى الناس عايشة فيه ومبقاش فى فاصل ومفيش حدود ولا خطوط حمرا ..

برضه مش فاهم حاجة .. ممكن توضح ..

يا عم بالراحة بس عليا أنا مكملتش كلامي .. زمان كان رغم الهيافة والتفاهة بتاعة التلفزيون بتاعنا اللى باقي على العهد بتاعنا لكنهم كانوا برضه عندهم حدود ومش كل حاجة بتشوفها فى التليفزيون .. ولما حاجة تتعرض ويلاقوا إنها مش مناسبة والناس تشتكي منها كانت بتتلغي فورا ومبتتعرض تاني .. والدليل قالولو .. قصدي والدليل الموقف اللى أنا حكيته بتاع الأشكيف ده .. لما لقوه حاجة مخيفة متناسبش سن الأطفال منعوه ومتعرضش تاني وبقى عمك الأشكيف حاجة أسطورية واللى شافها زيي أنا كده قعد شوية كدا خايف لكن نسيه .. لأنه متعرضش تاني ..

لكن دلوقتي حضرتك افتح أي قناة فضائية تلاقي فيها كل حاجة ممنوعة وكل حاجة متنفعش تتعرض أساسا .. سواء أفلام فيها لقطات زبالة وإباحية أو سواء أفلام رعب أو مسلسلات مبتذلة ومتعبرش ابدا عن الشارع المصري بأي شكل من الأشكال .. والقنوات دي مفيش رقيب عليها .. يعني ملهاش كبير من الآخر واللى عايزين يعرضوه بيعرضوه واللى مش عاجبه ينقى أتخن عمود خرسانة مسلح جنبه ويخبط دماغه فيه ..

مبقولش طبعا ميبقاش في قنوات فضائية لكن بقول يا جماعة يبقى فيه رقابة على الناس دي وعلى اللي بيقدموه متبقاش العملية سلطة كده .. لازم أي حاجة قبل ما تتعرض فى القنوات دي تمر على الرقابة بدل ما طفل صغير يشوف منظر مش كويس .. وعقبال ما تغير المحطة يكون الواد شاف وخلاص ..

يا ريت يا جدعان نتكلم فى الموضوع دا كلنا لأن الحكاية زادت عن حدها ومبقاش ينسكت عليها فعلا ..

دلوقتي فيه قنوات بتقولك إيه ( فيلم يعرض لأول مرة .. الفيلم الذي منع من العرض في السينما .. ولم يعرض في أي قناة .. فيلم الفتاة اللى مش لابسة حاجة خالص .. الفتاة التى شقلبت عرش مصر .. الفتاة التي مرمططت بكرامة نص حكام مصر الأرض .. قريبا على شاشة ............. !! ) .

العملية بقت أوفر أوي ولازم نتكلم كلنا ومنبقاش سلبيين أرجوكم مرة واحدة في حياتنا نقف وقفة من اللى هي دي .. ونتصل بإخواننا الفدائيين فى ميدان روكسي وهليوبليس ..

أيها الإخوة المناضلون .. إحنا عايزين نعمل شبكة سرية ومحدش يفهمني غلط فى سرية دي .. ونلم أطفال مصر كلهم ويطلعوا فى مظاهرة سلمية ( سلمية ) " سلمية " { سلمية } [ سلمية ] فى أكتر من كده عشان منروحش فى داهية .. ويقولوا رجعلونا الأشكيف حبيبنا .. رمز البراءة .. الأشكيف رمز الوداعة والنوم الطويل وعدم الخوف .. وأنا نويت لما أرشح نفسي فى الانتخابات بعد عمر طويل أخلي رمزي الانتخابي الأشكييييييييييييييييييييييف ..

انتخبوا المعلم فنكووش خير من يمثلكم فى مجلس الشعر ( بفتح الشين وتسكين العين ) .. المعلم فنكووش يحقق أحلامكم .. المعلم فنكوش 5 وظائف لكل مواطن وهو ينقى بمزاجه .. المعلم فنكووش رمز الأشكيف .. 10 شقق لكل مواطن وهو يسكن فى اللى تعجبه ويأجر الباقي إيجار جديد بقا ويعيش حياته .. المعلم فنكووش خير من يمثلكم ويمثل عليكم ويمثل بكم .. انتخبوني وابقوا تعالوا قابلوني .. لو بعد كدا شفتوني ..